Ĵurnalistino pafmortigita en palestina rifuĝejo
Vendredo, la 13-a de majo 2022
La 11-an de majo ĵurnalistino de la tut-araba televidkanalo Al-Ĝazira, Ŝirin Abu Akleh, estis pafmortigita de israelaj trupoj en Cisjordanio dum raportado de israel-armea atako kontraŭ la Ĝenina rifuĝejo lastmerkrede, asertis la kanalo.
La 51-jaraĝa usona-palestina ĵurnalistino estis pafita en la kapo, dum alia palestina ĵurnalisto, Ali al-Samudi, suferis dorsan vundon. Ŝi surhavis kuglorezistan veŝton, kiu havis la vorton "Gazetaro" skribitan per grandaj literoj. Laŭ aliaj ĵurnalistoj surloke, ŝi ne troviĝis en la interpafado, kiel povas esti la kazo en konfliktozonoj; ŝi estis laŭdire celita kaj pafita en la kapon. Kaj ili estas kategoriaj: la pafoj venis de la israela flanko. "Ni intencis filmi la operacon de la israela armeo kaj subite ili pafis nin sen peti nin foriri aŭ ĉesigi filmadon" diris al-Samudi. "Ni estis kvar ĵurnalistoj, ni ĉiuj surhavis veŝtojn, ĉiuj surhavis kaskojn" asertis alia ĉeestinta ĵurnalisto. "La [israela] okupa armeo ne ĉesis pafi eĉ post kiam ŝi falis. Mi eĉ ne povis etendi mian brakon por tiri ŝin pro la pafoj. La armeo estis nefleksebla pri pafado por mortigi."
La israela armeo konfirmis, ke ĝi plenumis operacon merkredon matene en la rifuĝejo de Ĝenin, sed neis, ke ĝi intence celis ĵurnalistojn. "La armeo evidente ne celas ĵurnalistojn" asertis israela armea oficisto.
La israela armeo tuj asertis, eĉ antaŭ enketo, ke la pafoj venis de la palestina flanko. La israelaj aŭtoritatoj poste asertis ke la Palestina Aŭtoritato (PA) rifuzis oferton pri komuna enketo; informoj tuj kontestitaj de la proparolanto de Mahmud Abbas, la prezidanto de la Palestina Aŭtoritato, laŭ kiu neniu oferto estis farita. Mahmud Abbas akuzis Israelon pro murdo de Ŝhirin Abu Akleh, samaj akuzoj venis el Kataro, la posedanto de la kanalo Al-Ĝazira, kiu havas neoficialajn rilatojn kun Israelo. La israela ĉefministro Naftali Bennett diris ĵaŭdon, ke la Palestina Aŭtoritato malhelpas klopodojn malkovri la veron. La saman tagon, la ambasadoro de Israelo en Usono, Michael Herzog, asertis, ke li klarigis al usonaj oficialuloj, ke Israelo strebas al justa enketo pri la "tragika evento" sed renkontas malemon de la Palestina Aŭtoritato (PA). "Ni interparolis kaj daŭre komunikas kun la usona administracio pri ĉi tiu okazaĵo" li diris. "Ni petis ilin subteni nian vidpunkton, ke devus esti komuna israela-palestina enketo." Sed Herzog rimarkigis, ke li klarigis al usonaj oficialuloj, ke la PA, inter aliaj, senpruve "rapidas akuzi Israelon de facto pri intenca murdo".
Post tiuj akraj interŝanĝoj estis lanĉitaj alvokoj al profunda enketo, precipe de Usono, ĉar la ĵurnalisto, naskiĝinta en Jerusalemo, havis usonan pasporton. Organizoj pri gazetarlibereco postulis internacian enketon, precipe Raportistoj Sen Limoj, kiu opinias, ke eble okazas malobservo de la Konvencioj de Ĝenevo kaj rezolucio de la Sekureca Konsilio de UN pri la protektado de ĵurnalistoj.
Ĵaŭde, kiam la ĉerko estis estis portita de la malsanulejo Sankta Josefo, situanta en Orienta Jerusalemo, konfrontiĝoj ekis post kiam manifestaciantoj ekkantis kantojn kaj eksvingis palestinajn flagojn. Israelaj sekurecaj taĉmentoj akuzis la homamason kaj uzis perforton, la ĉerko preskaŭ falis surteren. La Eŭropa Unio kondamnis la perforton de la israelaj sekurecaj taĉmentoj, la Eŭropa Delegacio diris al la palestinanoj ke ĝi estis "konsternita de (...) la nenecesa perforto-nivelo uzita de la israela polico dum la funebra procesio", aldonante, ke "tia neproporcia konduto nur nutras streĉitecojn".
La subita morto de ĵurnalisto konata de ĉiuj palestinanoj okazis en tre streĉa situacio: jam okazis konfrontiĝoj sur la Esplanado de la moskeoj en Jerusalemo, elpeloj de palestinanoj el iliaj hejmoj, murdoj de israelanoj en pluraj urboj en la lastaj semajnoj.
Fontoj
redakti- (fr) [[Pierre Haski]] «La mort de la journaliste palestinienne Shireen Abu Akleh : l’exigence de vérité» – France Inter, 12-05-2022 (arkivita [ ])
- (fr) «Shireen Abu Akleh, une journaliste d’Al Jazeera tuée par balle en Cisjordanie» – Courrier International, 11-05-2022 (arkivita [ ])
- (en) Zena Al Tahhan «Shireen Abu Akleh: Al Jazeera reporter killed by Israeli forces» – Al-Ĝazira, 12-05-2022 (arkivita [ ])
- (fr) Aaron Boxerman «L’enquête se concentrerait sur des tirs à 150 m d’où la journaliste a été tuée» – The times of Israel, 14-05-2022 (arkivita [ ])
- (fr) «Jérusalem : la police israélienne charge la foule lors des obsèques de la journaliste palestinienne Shireen Abu Akleh» – France Info, 13-05-2022 (arkivita [ ])
- (fr) «Mort de Shireen Abu Akleh : des obsèques bouleversées par des violences de la police israélienne» – Le Monde, 13-05-2022 (arkivita [ ])
|
Vi povas disvastigi ĉi-tiun artikolon per Interkonaj retejoj |
|
|
|
|
